حاملة الطائرات

كلنا تنسمعو حاملة الطائرات ولكن واش عارف شنو هي ؟؟
أول حاجة خاصك تعرف هو باش تصاوب حاملة الطائرات خاصك 13 مليار دولار (13 تريليون سنتيم مغربي) يعني قد ميزانية دولة البانيا أو جمهورية الكونغو أو جامايكا أو بوركينا فاسو ....
وقد ثروة ديال اغنى رجل في العالم جوج مرات ونص 
الوزن ديالها 100 ألف طن والطول ديالها 330 متر أي طول من 3 الملاعب ديال كرة القدم، الى جينا نشوفو الارتفاع واصلة ل 25 طابق فالسكن الاقتصادي ،
الطاقم لي فيها 2600 شخص كلهم جنود كل والتخصص ديالو وكتهز 90 طائرة منها حربية ولا ديال الاندار أو هليكوبتر وغيرهم ...
دبا اتجيك فراسك شحال كتستهلك ديال الوقود وفين عندها سطاسيون ههه
انقولك مكتخدمش بالمازوط ولا ليصانص ولكن فيها 2 مفاعلات نووية تيخدمو ليل ونهار تيولدو 600 ميغاواط . من الكهرباء والمحركات ديالها قادين يضوٌِو مدينة فيها 140 الف نسمة وبما أنها هي كتنتج راسها الطاقة بلا متزود بالوقود فهي تقدر تمشي للأبد متحبسش وفيها انظمة لتحلية مياه البحر بلا ميهزو معاهم الما
أمريكا متلا تقدر دخل فحرب فأي بلاصة من الكرة الأرضية بلا مطلق الصواريخ من أمريكا لديك الدولة أو تطلق الطائرات من أمريكا ولي خاصهم الوقود قبل ميوصلو لبلاصت الحرب ... دبا تقدر تسيفط حاملة طائرات لأي نقطة بقاو وهي مجهزة بكل ماتحتاج فالحرب
اتقولي مال الدولة لي #ليتحاربو_معاها مضرب حاملة الطائرات وتهنا .. ؟؟
إنت أهبل يلا .. !!
حاملة الطائرات ماشي غي سفينة وصافي لا بل مجهزة بجميع أنواع الدفاعات
أول حاجة متلا حاملة يو إس إس جيرالد فورد هي شبحية بمعنى واخا قدها قد السخط ماكيشدهاش الرادار ومتحس بيها حتى يهجمو عليك الطائرات الحربية من نوع إف 35 لي كاين منهم 2 اسراب والقيمة ديالهم مايقارب 3 مليار دولار أخر مغنات أم كلثوم فالسلاح
فيها طائرات الاواكس ديال التحذير المبكر محهزة برادارات غير تقرب شي فلوكة تلقا راسها قدام افواه قادفات الصواريخ والرشاسات
ومجهزة ايضا بالصواريخ الموجهة من نوع ram 162 ssim أرض جو
ايضا صواريخ cws متصلة بمدفع فولكان لي قادر يضرب 50 رصاصة فالثانية الواحدة زيد عليها مدافع رشاشة يدوية ... وحتى الغواصة معندها منين دوز حيت حاملة الطائرات فيها طائرات مجهزة بصواريخ جو بحر
هاد الشي لي دكرتو غير في حالة هي بغات دافع على راسها حيت قبل متوصلها شي قرطاسة خاص بعدا تجاوز الأسطول لي تيكون مرافق ليها لي فيه سرب من الطوافات والمدمرات والفرقاطات وزيد وزيد ...
وباش نختم ونصدمك أنقولك أمريكا عندها 11 حاملة طائرات.
معا للاستفادة